ایشین گیمز کرکٹ فائنل: بھارت نے پاکستان کو 19 رنز سے ہرا کر گولڈ میڈل جیت لیا
ناگویا: جاپان کے شہر نشین میں کھیلے گئے ایشین گیمز کے مینز کرکٹ ایونٹ کے سنسنی خیز فائنل میں بھارت نے پاکستان کو 19 رنز سے شکست دے کر گولڈ میڈل اپنے نام کر لیا، جبکہ قومی ٹیم سلور میڈل کی حقدار قرار پائی۔
بھارت نے ٹاس جیت کر پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 211 رنز کا مجموعہ ترتیب دیا۔ ابھیشیک شرما نے 28 گیندوں پر 61 اور تلک ورما نے تیز رفتار 51 رنز بنائے۔
پاکستان کی جانب سے عرفات منہاس اور احمد دانیال نے دو دو وکٹیں حاصل کیں۔ جواب میں 212 رنز کے ہدف کے تعاقب میں پاکستان کی ٹیم مقررہ اوورز میں 6 وکٹوں پر 192 رنز ہی بنا سکی۔
قومی ٹیم کے بیٹر حسن نواز نے 51 گیندوں پر 7 چھکوں اور 5 چوکوں کی مدد سے 96 رنز کی جارحانہ اننگز کھیلی، تاہم دیگر بیٹرز کا خاطر خواہ ساتھ نہ ملنے کے باعث ٹیم کو ناکامی کا سامنا کرنا پڑا۔
میچ میں ناقص فیلڈنگ اور 4 کیچز ڈراپ کرنا پاکستان کی ہار کی بنیادی وجہ بنی۔ دوسری جانب، اس میچ کے دوران مجموعی طور پر 403 رنز بنے جو پاک بھارت ٹی20 انٹرنیشنل کی تاریخ کا سب سے بڑا مجموعی اسکور ہے۔
ایشین گیمز میں بھی بھارت نے روایتی ہٹ دھرمی کا مظاہرہ کرتے ہوئے ٹاس کے وقت اور میچ کے اختتام پر بھارتی کپتان نے پاکستانی کپتان صاحبزادہ فرحان سے ہاتھ ملانے سے گریز کیا۔