مسجد الحرام میں افطار: 2 لاکھ افراد کی ضیافت، صرف 5 منٹ میں صفائی مکمل

مکہ مکرمہ: حرمین شریفین کی انتظامیہ نے مسجد الحرام میں تقسیم کیے جانے والے افطار کے اعلیٰ معیار کو یقینی بنانے کے لیے سخت اقدامات کیے ہیں، تاکہ زائرین کو محفوظ اور معیاری کھانے کی سہولت فراہم کی جا سکے۔

سعودی خبررساں ایجنسی کے مطابق، افطار کی تیاری میں صاف ستھری جگہ پر اسٹوریج، آلودگی سے پاک اجزا اور معیاری پیکیجنگ کی تصدیق جیسے عوامل شامل ہیں۔ مزید برآں، افطار کے نمونے مسجد الحرام کی لیبارٹری میں بھیجے جاتے ہیں، جہاں ان کا مائیکرو بائیولوجیکل اور کیمیائی تجزیہ کیا جاتا ہے تاکہ زائرین کی صحت کو یقینی بنایا جا سکے۔

حرمین شریفین کی انتظامیہ فلاحی اداروں کے تعاون سے روزانہ 2 لاکھ سے زائد افراد میں افطار تقسیم کر رہی ہے۔ اس عظیم خدمت میں 3 ہزار سے زائد ملازمین اور ایک ہزار سے زائد رضاکار حصہ لے رہے ہیں، جو روزانہ 3,200 افطار دسترخوان لگاتے ہیں۔

مسجد الحرام میں بچھائے جانے والے افطار دسترخوان کی مجموعی لمبائی 50 کلومیٹر تک پہنچتی ہے، اور حیران کن طور پر اتنے بڑے پیمانے پر ہونے والی افطار کے بعد صفائی کا عمل صرف 5 منٹ میں مکمل کر لیا جاتا ہے۔

تمام انتظامات میں اعلیٰ ترین صحت کے معیارات پر عمل کیا جا رہا ہے، تاکہ زائرین کو محفوظ اور آرام دہ ماحول میں افطار فراہم کیا جا سکے۔ مسجد الحرام میں ہونے والی یہ ضیافت نہ صرف انتظامی مہارت کا مظہر ہے بلکہ اسلام کی مہمان نوازی اور سخاوت کی بہترین مثال بھی ہے۔