دبئی سے تل ابیب جانے والی پرواز میں پائلٹ لڑ پڑے، طیارے کی سعودی عرب میں ہنگامی لینڈنگ
تبوک: دبئی سے تل ابیب (اسرائیل) جانے والی فلائی دبئی کی پرواز FZ1073 میں دورانِ پرواز کاک پٹ کے اندر پائلٹوں کے درمیان سنسنی خیز اور خونریز تنازع کے بعد طیارے کو سعودی عرب کے شہر تبوک میں ہنگامی طور پر اتار لیا گیا ہے۔
فلائٹ ٹریکنگ ڈیٹا اور ایوی ایشن ذرائع کے مطابق پرواز 37 ہزار فٹ کی بلندی پر تھی جب کاک پٹ میں پائلٹ اور معاون پائلٹ کے درمیان مبینہ ہاتھا پائی اور چاقو کے وار کے دوران طیارہ محض چند منٹوں میں 17 ہزار فٹ سے زائد کی گہرائی تک نیچے آ گیا۔
انتہائی تشویشناک صورتحال کے پیشِ نظر پہلے عمومی ہنگامی سگنل کوڈ 7700 اور بعد ازاں ہائی جیکنگ یا غیر قانونی مداخلت کا کوڈ 7500 فعال ہوا۔ اردن کی فضائی حدود سے طیارے کا رخ سعودی عرب موڑا گیا، جہاں تبوک ایئرپورٹ پر لینڈنگ کے فوراً بعد سعودی سیکیورٹی فورسز نے طیارے کو گھیرے میں لے کر دونوں زخمی پائلٹوں کو گرفتار کر کے ہسپتال منتقل کر دیا۔
اسرائیلی حکام اور میڈیا رپورٹس نے اس واقعے کو ممکنہ دہشت گردی کی کوشش بھی قرار دیا ہے، جہاں مبینہ طور پر معاون پائلٹ نے طیارہ کریش کرنے کی کوشش کی۔
تاہم، کیبن کریو اور مسافروں کی بروقت مداخلت سے ایک بڑے سانحے کو روک لیا گیا۔ ایئرلائن انتظامیہ کے مطابق طیارے میں سوار 150 سے زائد تمام مسافر محفوظ رہے، جنہیں بعد ازاں متبادل پرواز کے ذریعے تل ابیب منتقل کر دیا گیا ہے۔ حکام نے طیارے کے بلیک باکس اور ریکارڈرز کے ذریعے واقعے کی حتمی اور باضابطہ تحقیقات کا آغاز کر دیا ہے۔