مہنگائی کے ستائے عوام کے لیے بڑی خوشخبری؛ وزیراعظم کا ڈیزل کی قیمت میں 32 روپے سے زائد کمی کا اعلان
اسلام آباد: وزیراعظم محمد شہباز شریف نے مہنگائی کی چکی میں پسی ہوئی قوم کو بڑا ریلیف فراہم کرتے ہوئے ڈیزل کی قیمت میں 32 روپے 12 پیسے فی لیٹر کمی کی منظوری دے دی ہے۔
وزیراعظم ہاؤس سے جاری ہونے والے اعلامیے کے مطابق، اس کٹوتی کے بعد ڈیزل کی قیمت 385.54 روپے سے کم ہو کر 353.42 روپے فی لیٹر ہو گئی ہے۔
وزیراعظم نے حکام کو سخت ہدایات جاری کی ہیں کہ تیل کی قیمتوں میں اس کمی کے اثرات کو ٹرانسپورٹ کرایوں اور اشیائے خوردونوش کی قیمتوں میں کمی کی صورت میں فی الفور عوام تک پہنچایا جائے۔
پیٹرولیم ڈویژن کی جانب سے جاری کردہ نوٹیفکیشن کے مطابق نئی قیمتوں کا اطلاق 18 اپریل 2026 سے کر دیا گیا ہے، تاہم پیٹرول کی قیمت فی الحال 366 روپے 58 پیسے پر برقرار رکھی گئی ہے۔
حکومتی فیصلے کے تحت مٹی کے تیل کی قیمت میں بھی 21 روپے 34 پیسے فی لیٹر کی بڑی کمی کی گئی ہے، جس کے بعد اس کی نئی قیمت 428 روپے 81 پیسے مقرر کی گئی ہے۔
یاد رہے کہ گزشتہ ہفتے بھی حکومت نے ڈیزل کی قیمت میں 134 روپے سے زائد کی تاریخی کمی کی تھی، جس کے بعد آج مسلسل دوسری بار بڑی رعایت دی گئی ہے۔
معاشی ماہرین کا کہنا ہے کہ ایران کی جانب سے آبنائے ہرمز کھولنے کے اعلان کے بعد عالمی مارکیٹ میں خام تیل کی قیمتوں میں کمی کا رجحان جاری ہے، برینٹ کروڈ کی قیمت 13 فیصد تک گر کر 81 ڈالر فی بیرل پر آگئی ہے، جس کا براہِ راست فائدہ پاکستانی صارفین کو پہنچ رہا ہے۔
وزیراعظم شہباز شریف نے اپنے بیان میں عزم کا اعادہ کیا ہے کہ عالمی سطح پر قیمتوں میں کمی کا جو بھی فائدہ ہوگا وہ بغیر کسی تاخیر کے عوام کو منتقل کیا جائے گا۔ انہوں نے متعلقہ انتظامیہ کو ہدایت کی کہ ڈیزل سستا ہونے کے بعد مال برداری اور مسافر بسوں کے کرایوں میں کمی کو یقینی بنایا جائے تاکہ عام آدمی کو ریلیف محسوس ہو سکے۔
دوسری جانب، پیٹرول کی قیمت برقرار رہنے پر ملے جلے ردعمل کا اظہار کیا جا رہا ہے، تاہم ڈیزل کی قیمت میں مجموعی طور پر ہونے والی اس بڑی کمی سے زرعی اور صنعتی شعبے پر پیداواری لاگت کم ہونے کی توقع ہے۔