پی ایس ایل 11: پشاور زلمی کی فتوحات کا چھکا، کوئٹہ گلیڈی ایٹرز کو 8 وکٹوں سے ہرا کر پہلی پوزیشن مزید مستحکم کر لی

کراچی: نیشنل اسٹیڈیم کراچی میں کھیلے گئے ایچ بی ایل پاکستان سپر لیگ 11 کے 23ویں میچ میں پشاور زلمی نے اپنی فتوحات کا سلسلہ جاری رکھتے ہوئے کوئٹہ گلیڈی ایٹرز کو باآسانی 8 وکٹوں سے شکست دے دی ہے۔

اس فتح کے ساتھ ہی پشاور زلمی ایونٹ میں ناقابلِ شکست رہنے والی واحد ٹیم کے طور پر اپنی پہلی پوزیشن کو مزید مستحکم کر چکی ہے، جس نے 7 میچوں میں سے 6 فتوحات حاصل کیں اور 13 پوائنٹس کے ساتھ سرفہرست ہے۔

پشاور زلمی نے ٹاس جیت کر کوئٹہ گلیڈی ایٹرز کو پہلے بیٹنگ کی دعوت دی، جو زلمی کے باؤلرز کی نپی تلی باؤلنگ کے سامنے ریت کی دیوار ثابت ہوئی اور پوری ٹیم مقررہ 20 اوورز میں 154 رنز بنا کر آؤٹ ہوگئی۔

گلیڈی ایٹرز کی جانب سے حسن نواز 37 اور رائلی روسو 26 رنز بنا کر نمایاں رہے۔ قابلِ ذکر بات یہ ہے کہ رائلی روسو پی ایس ایل کی تاریخ میں 100 میچز مکمل کرنے والے پہلے غیر ملکی کھلاڑی بھی بن گئے ہیں۔

پشاور زلمی کے نوجوان باؤلرز نے میچ پر اپنی گرفت مضبوط رکھی، بالخصوص محمد باسط اور سفیان مقیم نے شاندار باؤلنگ کا مظاہرہ کرتے ہوئے 3، 3 وکٹیں حاصل کیں اور حریف بیٹنگ لائن کو بڑا اسکور کرنے سے روکے رکھا۔ افتخار احمد کے حصے میں بھی ایک وکٹ آئی۔

155 رنز کے ہدف کے تعاقب میں پشاور زلمی کا آغاز انتہائی پراعتماد رہا۔ اوپنر محمد حارث نے 35 رنز کی جارحانہ اننگز کھیل کر ٹیم کو مضبوط بنیاد فراہم کی، جبکہ کوشال مینڈس نے 21 رنز بنا کر ان کا ساتھ دیا۔

ہدف کے تعاقب میں اصل رنگ کپتان بابر اعظم نے بھرا، جنہوں نے ایک بار پھر اپنی کلاس ثابت کرتے ہوئے 71 رنز کی انتہائی ذمہ دارانہ اور ناقابلِ شکست اننگز کھیلی۔

زلمی نے مطلوبہ ہدف 19ویں اوور کی تیسری گیند پر صرف 2 وکٹوں کے نقصان پر حاصل کر لیا۔ ایرون ہارڈی 18 رنز بنا کر بابر اعظم کے ساتھ ناٹ آؤٹ پویلین لوٹے۔

کوئٹہ گلیڈی ایٹرز کی جانب سے کپتان سعود شکیل اور الزاری جوزف صرف ایک ایک وکٹ ہی حاصل کر سکے۔

اس شکست کے بعد کوئٹہ گلیڈی ایٹرز کی ٹیم پوائنٹس ٹیبل پر 2 کامیابیوں کے ساتھ پانچویں پوزیشن پر موجود ہے، جبکہ پشاور زلمی کی ٹیم پلے آف کی دوڑ میں سب سے آگے نکل چکی ہے۔