پی آئی اے ہولڈنگ کمپنی کا اہم اجلاس 24 مارچ کو طلب، نجکاری اور برطانوی پروازوں کی بحالی پر غور ہوگا
اسلام آباد: پی آئی اے ہولڈنگ کمپنی کے بورڈ آف ڈائریکٹرز کا اہم اجلاس 24 مارچ کو طلب کر لیا گیا ہے، جس میں قومی ایئرلائن کی نجکاری، مالی امور اور برطانوی فلائٹ آپریشن کی بحالی جیسے اہم معاملات پر غور کیا جائے گا۔
ذرائع کے مطابق اجلاس میں پی آئی اے کے مالی امور کا جائزہ لیا جائے گا اور جون 2024 کی شش ماہی آڈٹ رپورٹ کی منظوری دی جائے گی۔ اس کے ساتھ ساتھ نجکاری کے نئے مسودے اور اہداف پر بھی تبادلہ خیال ہوگا تاکہ مستقبل میں ایئرلائن کو زیادہ مؤثر اور منافع بخش بنایا جا سکے۔
اجلاس میں یورپ کے بعد برطانیہ کے فلائٹ آپریشن کی بحالی کا بھی جائزہ لیا جائے گا۔ پی آئی اے انتظامیہ برطانیہ کے لیے فلائٹ آپریشن کی تیاریوں پر بورڈ ارکان کو تفصیلی بریفنگ دے گی۔
ذرائع کے مطابق اجلاس میں پی آئی اے کی ملکی اور بیرونِ ملک جائیدادوں کے حوالے سے بھی تبادلہ خیال ہوگا۔ اس موقع پر پی آئی اے کے آپریشنل بیڑے اور دیگر انتظامی امور پر بھی غور کیا جائے گا تاکہ ایئرلائن کی مجموعی کارکردگی کو بہتر بنایا جا سکے۔
یہ اجلاس ایسے وقت میں ہو رہا ہے جب پاکستان کی قومی ایئرلائن شدید مالی مشکلات اور نجکاری کے عمل سے گزر رہی ہے۔ ماہرین کے مطابق، اس اجلاس کے فیصلے پی آئی اے کے مستقبل کے لیے نہایت اہم ثابت ہو سکتے ہیں۔