مکہ دفاعی معاہدہ خطے میں امن کی ضمانت، سعودی عرب کا دفاع کریں گے: ڈی جی آئی ایس پی آر
راولپنڈی: پاک فوج کے شعبہ تعلقات عامہ (ISPR) کے ڈائریکٹر جنرل (ڈی جی) لیفٹیننٹ جنرل احمد شریف چوہدری نے امریکی نشریاتی ادارے سی این این (CNN) کو دیے گئے انٹرویو میں واضح کیا ہے کہ پاکستان، سعودی عرب اور ترکیے کے درمیان طے پانے والا مکہ مشترکہ دفاعی معاہدہ خطے میں امن و استحکام کی ضمانت ہے اور اس کے تحت سعودی عرب اور حرمین شریفین کا کامل دفاع کیا جائے گا۔
ترجمان پاک فوج نے بتایا کہ پاکستانی افواج مختلف صلاحیتوں اور شعبوں میں کئی دہائیوں سے سعودی عرب میں موجود ہیں، جبکہ مکہ معاہدے کے تحت فوجیوں اور دستوں کی عملی تعیناتی کے طریقہ کار اور حکمتِ عملی کا فیصلہ آپریشنل کمانڈرز کریں گے۔
انہوں نے کہا کہ معاہدے کے تحت کسی ایک رکن ملک پر حملہ تمام ارکان پر حملہ تصور کیا جائے گا، جس سے مذموم مقاصد رکھنے والے عناصر کوئی بھی قدم اٹھانے سے پہلے بارہا سوچنے پر مجبور ہوں گے۔
ایران اور امریکا کے درمیان جاری 7 ماہ طویل جنگ کے حوالے سے گفتگو کرتے ہوئے لیفٹیننٹ جنرل احمد شریف چوہدری نے کہا کہ پاکستان نے ایک غیر جانب دار اور دیانت دار ثالث کے طور پر ہمیشہ جنگ بندی اور مذاکرات کے لیے کردار ادا کیا ہے اور آئندہ بھی کرتا رہے گا۔
انہوں نے زور دیا کہ پاکستان نے خطے میں ایران پر امریکی و اسرائیلی حملوں اور عرب و خلیجی ممالک پر ایرانی حملوں دونوں کی مخالفت کی ہے، کیونکہ جنگ کے مزید پھیلاؤ میں کسی کا فائدہ نہیں ہے۔