بلوچستان میں سیکیورٹی فورسز کے متعدد کامیاب آپریشنز، 96 گھنٹوں میں 71 دہشت گرد ہلاک
راولپنڈی: پاک فوج کے شعبہ تعلقاتِ عامہ (آئی ایس پی آر) کے مطابق سیکیورٹی فورسز نے گزشتہ 96 گھنٹوں کے دوران بلوچستان کے مختلف اضلاع میں مؤثر اور کامیاب انٹیلی جنس بیسڈ آپریشنز کرتے ہوئے 71 سے زائد دہشت گردوں کو جہنم واصل کر دیا ہے، جس سے بھارتی سرپرستی میں سرگرم افغان پراکسیز کو شدید دھچکا پہنچا ہے۔
آئی ایس پی آر کی جانب سے جاری کردہ تفصیلات کے مطابق خفیہ اداروں نے کوئٹہ کے علاقے شعبان، زیارت، نوشکی اور مند میں ’فتنۃ الخوارج‘ اور ’فتنۃ الہندوستان‘ کے ٹھکانوں کی نشان دہی کی تھی جو مقالمی آبادی کے لیے شدید خطرہ بنے ہوئے تھے۔
سیکیورٹی فورسز نے 21 ستمبر 2026ء سے زیارت اور گرد و نواح میں ’آپریشن شعبان‘ کا آغاز کیا، جس کے دوران شدید فائرنگ کے تبادلے کے بعد 33 خوارج ہلاک کیے گئے۔
اس کے علاوہ 25 ستمبر کو نوشکی میں بھارتی سرپرستی میں متحرک 11 اور مند کے علاقے میں 6 دہشت گردوں کو ہلاک کر کے بھاری مقدار میں اسلحہ، گولہ بارود اور دھماکا خیز مواد برآمد کیا گیا۔
ترجمان پاک فوج کا کہنا ہے کہ دہشت گردی کی ان کارروائیوں میں افغان طالبان حکومت کا ملوث ہونا اور بھارت کی جانب سے انہیں مکمل معاونت کی فراہمی خطے کے امن و استحکام کے لیے شدید خطرہ ہے۔
ترجمان نے واضح کیا کہ ’عزمِ استحکام‘ وژن کے تحت ملک سے غیر ملکی حمایت یافتہ دہشت گردی کے مکمل خاتمے تک یہ کلیئرنس آپریشنز پوری قوت کے ساتھ جاری رہیں گے۔
وفاقی وزیرِ داخلہ محسن نقوی نے سیکیورٹی فورسز کو ان کامیاب کارروائیوں پر زبردست خراجِ تحسین پیش کیا ہے۔