آزاد کشمیر میں عام انتخابات مرحلہ وار کرانے کا فیصلہ؛ چیف الیکشن کمشنر نے نیا شیڈول جاری کر دیا
مظفر آباد: الیکشن کمیشن آزاد جموں و کشمیر نے ملک میں انتظامی و سیکیورٹی امور کو مدِنظر رکھتے ہوئے آزاد کشمیر میں عام انتخابات ملتوی کرنے کے مطالبات مسترد کر دیے ہیں اور الیکشن مرحلہ وار کرانے کا نیا ترمیم شدہ شیڈول جاری کر دیا ہے۔
مظفر آباد میں پریس کانفرنس کرتے ہوئے چیف الیکشن کمشنر جسٹس (ر) غلام مصطفیٰ مغل نے ممبران الیکشن کمیشن اور سیکریٹری الیکشن کمیشن کی موجودگی میں بتایا کہ تمام سیاسی جماعتوں سے مشاورت اور پاک فوج کی نفری کی دستیابی کے بعد انتخابات تین مراحل میں منعقد کرنے کا فیصلہ کیا گیا ہے۔
نئے انتخابی شیڈول کے تحت:
- پہلا مرحلہ (27 جولائی): میرپور ڈویژن میں پولنگ ہوگی۔
- دوسرا مرحلہ (2 اگست): مظفرآباد ڈویژن کے ساتھ ساتھ مقیم پاکستان مہاجرین کی 12 نشستوں پر ووٹنگ ہوگی۔
- تیسرا مرحلہ (10 اگست): پونچھ ڈویژن میں پولنگ کے ساتھ انتخابی عمل مکمل ہوگا۔
چیف الیکشن کمشنر کے مطابق ہر مرحلے کی پولنگ کے بعد اسی مرحلے کے سرکاری و غیر سرکاری نتائج الگ سے جاری کیے جائیں گے۔
27 جولائی سے شروع ہونے والے انتخابی عمل کے لیے کل 33 لاکھ 65 ہزار 839 رجسٹرڈ ووٹرز حقِ رائے دہی استعمال کریں گے، جن میں 17 لاکھ 53 ہزار 933 مرد اور 16 لاکھ 11 ہزار 906 خواتین ووٹرز شامل ہیں۔
الیکشن کمیشن نے واضح کیا ہے کہ پاک فوج کی نگرانی میں پرامن، آزادانہ اور شفاف پولنگ کو یقینی بنایا جائے گا، جبکہ عالمی مبصرین اور میڈیا نمائندوں کو تمام انتخابی کارروائی کی کوریج کی مکمل اجازت ہوگی۔