نورین نیازی کا بیان مودی کے حق میں اور شرمناک ہے؛ وزیر اطلاعات پنجاب عظمیٰ بخاری کا شدید ردِعمل

لاہور: وزیر اطلاعات پنجاب عظمیٰ بخاری نے پاکستان تحریک انصاف (پی ٹی آئی) کے بانی عمران خان کی ہمشیرہ نورین نیازی کی جانب سے پاک فوج اور ‘معرکہ حق’ کے خلاف دیے گئے متنازع بیان پر اپنے شدید ردِعمل کا اظہار کرتے ہوئے اس کی سخت ترین الفاظ میں مذمت کی ہے۔

اپنے ایک خصوصی پریس بیان میں عظمیٰ بخاری کا کہنا تھا کہ نورین نیازی کا یہ شرمناک بیان دراصل ان کے اپنے بھائی کی مخصوص اور منفی سوچ کی عکاسی کرتا ہے، کیونکہ اس پورے خاندان کو پاکستان کی ہر کامیابی سے ہمیشہ تکلیف ہوتی ہے۔

صوبائی وزیر اطلاعات نے ملکی دفاعی تاریخ کا حوالہ دیتے ہوئے کہا کہ پوری دنیا نے اس حقیقت کو تسلیم کیا ہے کہ پاکستان نے بھارت کو معرکہ حق میں عبرتناک اور تاریخی شکست سے دوچار کیا تھا۔

انہوں نے افسوس کا اظہار کرتے ہوئے کہا کہ ایسے قومی معرکے پر نورین نیازی کا فاشسٹ مودی کے حق میں بات کرنا اور صفائیاں دینا انتہائی شرمناک اور ناقابلِ قبول ہے۔

عظمیٰ بخاری نے سخت تنقید کرتے ہوئے مزید کہا کہ بانی پی ٹی آئی اور ان کی تینوں بہنیں یا تو خود کو دنیا کی عقلِ کُل شخصیات سمجھتی ہیں یا پھر وہ ذہنی طور پر پاگل ہو چکی ہیں، کیونکہ بانی پی ٹی آئی اور ان کی فیملی سے پاکستان کے لیے کبھی کوئی خیر کی امید نہیں کی جا سکتی۔

عظمیٰ بخاری نے اپنے بیان کے آخر میں واضح کیا کہ معرکہ حق میں افواجِ پاکستان اور ہمارے فضائیہ کے شاہینوں نے وطنِ عزیز کے دفاع کے لیے جو تاریخی کارنامے رقم کیے تھے، پاک فوج کی ان شاندار کامیابیوں پر پوری قوم کو ہمیشہ فخر رہے گا۔

یاد رہے کہ عمران خان کی بہن نورین نیازی نے ایک حالیہ یوٹیوب انٹرویو میں الزام لگایا تھا کہ معرکہ حق دراصل پاک فوج اور مودی کا آپسی گٹھ جوڑ تھا اور بھارت نے اسرائیل کے کہنے پر حملہ کرنے سے گریز کیا کیونکہ پاکستان اسرائیل کو تسلیم کرنے جا رہا تھا، جس پر قومی سطح پر شدید غم و غصہ پایا جا رہا ہے۔