واقعہ کربلا ہمیں اصولوں پر ثابت قدم رہنے کا درس دیتا ہے، یومِ عاشور پر صدر و وزیراعظم کا پیغام

اسلام آباد: صدرِ مملکت آصف علی زرداری اور وزیراعظم محمد شہباز شریف نے یومِ عاشور (10 محرم الحرام) کے مقدّس موقع پر پوری قوم اور امتِ مسلمہ کے نام اپنے خصوصی اور الگ الگ پیغامات جاری کیے ہیں۔

اپنے بیانات میں دونوں رہنماؤں نے واضح کیا ہے کہ یومِ عاشور ہمیں صبر، استقامت، لازوال ایثار، حق گوئی اور اصولوں پر ہر حال میں ثابت قدم رہنے کا ابدی درس دیتا ہے۔

وزیراعظم شہباز شریف نے کہا کہ معرکۂ کربلا ہمیں یہ عظیم پیغام دیتا ہے کہ اصولوں اور انسانی اقدار کی پاسداری ہی کسی بھی مہذب معاشرے کی مضبوط بنیاد ہوتی ہے، اس لیے ہمیں اپنی صفوں میں عدل و انصاف، صبرو برداشت اور سماجی ذمہ داری کے اوصاف کو فروغ دینا ہوگا۔

انہوں نے علمائے کرام، مشائخ، ذاکرین اور میڈیا پر زور دیا کہ وہ یومِ عاشور کے حقیقی اور آفاقی پیغام کو اجاگر کریں اور ملک میں انتشار و نفرت کے بجائے بین المسالک احترام، رواداری اور بھائی چارے کی فضا کو قائم رکھیں۔

دوسری جانب، صدرِ مملکت آصف علی زرداری نے اپنے پیغام میں کہا کہ واقعہ کربلا محض ایک تاریخی سانحہ نہیں بلکہ رہتی دنیا تک کے لیے ایک دائمی پیغام اور ایک زندہ درسگاہ ہے۔

انہوں نے عوام سے اپیل کی کہ اس متبرک دن کی مناسبت سے ملک بھر میں امن، بین المذاہب رواداری اور مسالک کے مابین احترام کے رویوں کو پروان چڑھایا جائے تاکہ شرپسند عناصر کو نفرت پھیلانے کا کوئی موقع نہ مل سکے۔