شمالی وزیرستان میں سیکیورٹی فورسز کا بڑا آپریشن، 72 گھنٹوں میں فتنۃ الخوارج کے 48 دہشت گرد ہلاک
پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کے علاقے میران شاہ اور اس کے گرد و نواح میں سیکیورٹی فورسز نے خفیہ معلومات کی بنیاد پر بڑی کارروائیاں کرتے ہوئے گزشتہ 72 گھنٹوں کے دوران فتنۃ الخوارج کے 48 دہشت گردوں کو ہلاک کر دیا ہے۔
آئی ایس پی آر کے مطابق سیکیورٹی فورسز کی جانب سے جاری انٹیلی جنس بیسڈ آپریشنز کے تسلسل میں خوارج کے متعدد ٹھکانوں کو انتہائی مہارت اور درستگی کے ساتھ نشانہ بنایا گیا، جس کے نتیجے میں شدید جھڑپوں کے بعد بھارت کی سرپرستی میں چلنے والے فتنۃ الخوارج کے مزید 21 دہشت گرد مارے گئے، جن میں 4 اہم ترین کمانڈر خارجی خالد رضا عرف سالار، خارجی مفتون، خارجی موسیٰ اور خارجی عمران عرف ایان بھی شامل ہیں۔
ترجمان پاک فوج کا کہنا ہے کہ فورسز کے اس کامیاب آپریشن سے علاقے میں فعال خوارج کے نیٹ ورک کو کاری ضرب لگی ہے اور ہلاک ہونے والے یہ خارجی کمانڈر سیکیورٹی فورسز کے اہلکاروں اور بے گناہ شہریوں کے قتل سمیت متعدد سنگین دہشت گردانہ کارروائیوں میں قانون نافذ کرنے والے اداروں کو انتہائی مطلوب تھے۔
آپریشن کے دوران ہلاک ہونے والے بھارت نواز دہشت گردوں کے قبضے سے بھاری مقدار میں جدید اسلحہ اور گولہ بارود بھی برآمد کر لیا گیا ہے جبکہ علاقے میں چھپے باقی ماندہ خوارج کے مکمل خاتمے کے لیے سیکیورٹی فورسز کا کلیئرنس آپریشن اب بھی بدستور جاری ہے۔
وفاقی ایپکس کمیٹی برائے نیشنل ایکشن پلان کی منظوری کے بعد سیکیورٹی فورسز اور قانون نافذ کرنے والے ادارے عزم استحکام کے وژن کے تحت ملک سے غیر ملکی حمایت یافتہ دہشت گردی کے خاتمے کے لیے اپنی انسداد دہشت گردی مہم پوری قوت اور عزم کے ساتھ جاری رکھنے کے لیے پرعزم ہیں۔
دوسری جانب صدر مملکت آصف علی زرداری، وزیراعظم شہباز شریف اور وفاقی وزیر داخلہ محسن نقوی نے شمالی وزیرستان میں فتنۃ الخوارج کے خلاف اس کامیاب اور بڑی کارروائی پر سیکیورٹی فورسز کے افسران اور جوانوں کو زبردست خراج تحسین پیش کیا ہے۔
اپنے الگ الگ بیانات میں انہوں نے فتنۃ الخوارج کے متعدد دہشت گردوں کو ہلاک کرنے پر سیکیورٹی فورسز کی پیشہ ورانہ صلاحیتوں اور لازوال بہادری کو سراہا۔ ان کا کہنا تھا کہ بھارتی سرپرستی میں سرگرم فتنۃ الخوارج کے سرغنوں کا خاتمہ دہشت گردی کے نیٹ ورک کے خلاف ایک انتہائی اہم اور بڑی کامیابی ہے۔
انہوں نے مزید کہا کہ پوری قوم اپنی بہادر سیکیورٹی فورسز کے شانہ بشانہ کھڑی ہے اور عوام کی بھرپور حمایت سے ملک بھر سے دہشت گردوں اور ان کے سہولت کاروں کے مکمل خاتمے کا یہ سلسلہ منطقی انجام تک جاری رہے گا۔