ورلڈ کپ 2026 کے دوسرے روز کینیڈا اور بوسنیا کا اعصاب شکن ٹکراؤ، میچ ایک ایک گول سے برابر
فیفا فٹبال ورلڈ کپ 2026 کے دوسرے دن کے پہلے میچ میں مشترکہ میزبان کینیڈا اور بوسنیا کی ٹیموں کے درمیان کھیلا گیا انتہائی دلچسپ اور سنسنی خیز مقابلہ 1-1 گول سے برابری پر ختم ہو گیا ہے۔
ٹورنٹو کے تاریخی اسٹیڈیم میں کھیلے گئے اس اہم میچ میں ہوم ٹیم کینیڈا نے آغاز سے ہی انتہائی جارحانہ کھیل کا مظاہرہ کیا اور حریف ٹیم کے گول پوسٹ پر مسلسل حملے کیے، لیکن میچ میں پہلی کامیابی اور برتری غیر متوقع طور پر بوسنیا کی ٹیم نے حاصل کی۔
کھیل کے 21ویں منٹ میں بوسنیا کے کھلاڑی جووو لوکچ نے کینیڈین دفاع کو چکمہ دیتے ہوئے گیند کو حریف ٹیم کے جال میں پہنچا کر اپنی ٹیم کو 0-1 کی اہم برتری دلا دی۔ اس گول کے بعد کینیڈا نے مقابلہ برابر کرنے کی کوشش کی لیکن پہلے ہاف کے اختتام تک مقابلہ بوسنیا کے حق میں رہا۔
دوسرے ہاف کا آغاز ہوا تو کینیڈا کی ٹیم نے ہوم کراؤڈ کے سامنے مزید جارحانہ انداز اختیار کیا اور بوسنیا پر دباؤ شدید بڑھا دیا۔ کینیڈین اسٹرائیکرز کو گول اسکور کرنے کے کئی بہترین اور یقینی مواقع بھی ملے مگر حریف ٹیم کے مضبوط دفاع اور خراب قسمت کے باعث وہ ابتدائی طور پر گیند کو جال میں پہنچانے میں ناکام رہے۔
دوسری جانب بوسنیا نے بھی اپنی برتری کو برقرار رکھنے کے لیے بہترین کھیل پیش کیا اور کینیڈا کے ہر حملے کو ناکام بناتے ہوئے کھیل پر اپنی گرفت مضبوط رکھنے کی کوشش کی لیکن کینیڈا کی مسلسل کوششیں آخر کار رنگ لے آئیں۔
کھیل کے 79ویں منٹ میں کینیڈا کے کھلاڑی گائل نے حریف ڈی فینڈرز کے حصار کو توڑتے ہوئے ایک شاندار کک کے ذریعے گول کر کے مقابلہ 1-1 سے برابر کر دیا اور اسٹیڈیم میں موجود ہزاروں تماشائیوں کو جشن منانے کا موقع فراہم کیا۔
کینیڈا کی جانب سے میچ برابر کیے جانے کے بعد دونوں ٹیموں نے برتری حاصل کرنے اور میچ جیتنے کے لیے آخری منٹوں میں ایک دوسرے کے گول پوسٹ پر بھرپور حملے کیے اور فاؤلز بھی دیکھنے کو ملے، مگر مقررہ وقت کے خاتمے تک کوئی بھی ٹیم فیصلہ کن گول اسکور کرنے میں کامیاب نہ ہو سکی۔
یوں فٹبال ورلڈ کپ کا یہ اہم مقابلہ 1-1 گول کی برابری پر ختم ہوا اور دونوں ٹیموں کو ٹورنامنٹ کے اپنے پہلے میچ میں ایک ایک پوائنٹ پر ہی اکتفا کرنا پڑا۔