بارش سے متاثرہ فیصلہ کن ٹی20 میں سری لنکا نے پاکستان کو 14 رنز سے ہرا دیا، سیریز برابر
دمبولا میں کھیلے گئے تین میچوں کی ٹی20 سیریز کے آخری اور فیصلہ کن مقابلے میں سری لنکا نے پاکستان کو 14 رنز سے شکست دے کر سیریز 1-1 سے برابر کر دی۔
بارش کے باعث میچ تاخیر سے شروع ہوا اور دونوں ٹیموں کو 12،12 اوورز کھیلنے کا موقع ملا۔
پاکستان نے ٹاس جیت کر فیلڈنگ کا فیصلہ کیا، جس پر میزبان سری لنکا نے جارحانہ بیٹنگ کرتے ہوئے 6 وکٹوں کے نقصان پر 160 رنز بنائے۔
کپتان داسن شناکا نے تیز رفتار 34، کوشال مینڈس نے 30 جبکہ جنتھ لیانگے اور دھننجایا ڈی سلوا نے 22، 22 رنز اسکور کیے۔
پاکستان کی جانب سے محمد وسیم جونیئر نے 3 وکٹیں حاصل کیں، جبکہ محمد نواز، فہیم اشرف اور نسیم شاہ نے ایک ایک کھلاڑی کو آؤٹ کیا۔
161 رنز کے ہدف کے تعاقب میں پاکستان کی ٹیم مقررہ اوورز میں 8 وکٹوں پر 146 رنز ہی بنا سکی۔
کپتان سلمان آغا نے 12 گیندوں پر جارحانہ 45 رنز کی اننگز کھیلی، محمد نواز نے 28 اور خواجہ نافع نے 26 رنز بنائے، تاہم سری لنکن بولرز نے دباؤ برقرار رکھا۔
وانندو ہسارنگا 4 وکٹیں لے کر نمایاں رہے۔
اس جیت کے ساتھ سری لنکا نے سیریز برابر کر دی؛ پہلا میچ پاکستان نے جیتا تھا جبکہ دوسرا بارش کی نذر ہوا تھا۔