بلوچستان کے بہادر سپوت لیفٹیننٹ کرنل خالد حسین شہید کی نمازِ جنازہ کوئٹہ میں ادا؛ وزیراعظم اور فیلڈ مارشل کی شرکت

بلوچستان میں دہشت گردوں کے خلاف جاری ایک آپریشن کے دوران غیر معمولی بہادری کا مظاہرہ کرتے ہوئے جامِ شہادت نوش کرنے والے لیفٹیننٹ کرنل خالد حسین کی نمازِ جنازہ ہیڈ کوارٹر ایف سی بلوچستان (نارتھ) کوئٹہ میں ادا کر دی گئی ہے۔

نمازِ جنازہ میں اعلیٰ عسکری، سول اور سیاسی حکام سمیت شہریوں کی بڑی تعداد نے شرکت کی اور مادرِ وطن کے دفاع میں اپنی جان قربان کرنے والے بہادر افسر کو شاندار الفاظ میں خراجِ عقیدت پیش کیا۔ شرکاء نے شہید کی قربانی کو ملک کے امن و استحکام کے لیے ایک ناقابلِ فراموش مثال قرار دیا۔

لیفٹیننٹ کرنل خالد حسین نے بلوچستان میں دہشت گردوں کے ناپاک عزائم کو خاک میں ملاتے ہوئے ہراول دستے کی قیادت کی اور ملک کی سلامتی کی خاطر اپنی جان کا نذرانہ پیش کیا۔

نمازِ جنازہ کے موقع پر فضا سوگوار تھی، تاہم افسران اور جوانوں کے حوصلے بلند نظر آئے۔ عسکری حکام کا کہنا تھا کہ ایسی قربانیاں دشمن کے خلاف ہمارے عزم کو مزید مضبوط کرتی ہیں اور قوم اپنے ان بہادر سپوتوں کو کبھی فراموش نہیں کرے گی جنہوں نے اپنے خون سے ارضِ پاک کی حفاظت کی۔

شہید لیفٹیننٹ کرنل خالد حسین کے جسدِ خاکی کو ان کے آبائی گاؤں روانہ کر دیا گیا ہے، جہاں انہیں مکمل فوجی اعزاز کے ساتھ سپردِ خاک کیا جائے گا۔

پاک فوج کے چاق و چوبند دستے شہید کو سلامی پیش کریں گے اور ملک و قوم کا سر فخر سے بلند کرنے والے اس مجاہد کو آخری سفر پر روانہ کیا جائے گا۔