عمران خان کی نجی اسپتال منتقلی: سپریم کورٹ کے رجسٹرار آفس کا حکومتی نظرثانی درخواست پر اعتراض
اسلام آباد: سپریم کورٹ کے رجسٹرار آفس نے بانی پاکستان تحریک انصاف (پی ٹی آئی) عمران خان کو نجی اسپتال منتقل کرنے کے فیصلے کے خلاف وفاقی حکومت کی جانب سے دائر کی گئی نظرثانی درخواست اعتراضات لگا کر واپس کر دی ہے۔
ذرائع کے مطابق رجسٹرار آفس نے سپریم کورٹ میں چیف کمشنر اسلام آباد کی جانب سے دائر کردہ نظرثانی درخواست میں ‘پیپر بُکس’ مکمل نہ ہونے اور دیگر تکنیکی خامیوں پر اعتراضات عائد کیے۔ حکومتی قانونی ٹیم کے ذرائع کا کہنا ہے کہ اعتراضات کو دور کرنے اور درخواست میں کچھ اضافی معروضات کے ساتھ ترمیم کرنے کے بعد اسے جلد دوبارہ دائر کیا جائے گا۔
دوسری جانب سپریم کورٹ کی جانب سے عمران خان کو دو روز کے اندر شفا انٹرنیشنل اسپتال منتقل کرنے کے حکم پر عملدرآمد نہ ہونے پر پی ٹی آئی کی قانونی ٹیم نے سخت تشویش کا اظہار کیا ہے۔
عمران خان کے وکیل خالد یوسف چوہدری نے خبردار کیا ہے کہ حکومت عدالتی احکامات کی مسلسل خلاف ورزی کر کے ہٹ دھرمی دکھا رہی ہے اور اگر بلا تاخیر منتقلی کا عمل پورا نہ کیا گیا تو وہ حکومت اور جیل حکام کے خلاف توہینِ عدالت کی درخواست دائر کریں گے۔