پاکستان کی ویسٹ انڈیز کو 8 وکٹوں سے شکست، سیریز 1-1 سے برابر
پورٹ آف اسپین: پاکستان نے دوسرے ٹیسٹ میچ میں ہوسٹ ویسٹ انڈیز کو 8 وکٹوں سے شکست دے کر دو میچوں کی سیریز 1-1 سے برابر کر دی ہے۔
اس تاریخی کامیابی کے ساتھ ہی پاکستان نے بیرونِ ملک مسلسل آٹھ ٹیسٹ میچوں میں ناکامی کے بعد اپنی پہلی فتح حاصل کر لی ہے، اس سے قبل قومی ٹیم نے 2023 میں سری لنکا کو اسی کی سرزمین پر ہرایا تھا۔
پہلی اننگز میں ویسٹ انڈیز کے 344 رنز کے جواب میں پاکستان نے عبداللہ شفیق کی شاندار 160 رنز کی ناقابلِ شکست اننگز اور بابر اعظم کے 88 رنز کی بدولت 387 رنز بنا کر 43 رنز کی برتری حاصل کی تھی۔
میچ کے چوتھے روز ویسٹ انڈیز نے اپنی دوسری اننگز 103 رنز 6 کھلاڑی آؤٹ سے دوبارہ شروع کی، تاہم پاکستانی اسپنرز ساجد خان اور علی عثمان کی تباہ کن بولنگ کے سامنے میزبان ٹیم کی باقی تین وکٹیں صرف 14 رنز کے اضافے پر گر گئیں اور پوری ٹیم 117 رنز پر ڈھیر ہو گئی۔
ویسٹ انڈیز کے زخمی اوپنر برانڈن کنگ کمر کی تکلیف کے باعث بیٹنگ کے لیے نہ آ سکے جبکہ ساجد خان اور علی عثمان دونوں نے چار، چار وکٹیں حاصل کیں۔
پاکستان نے 75 رنز کا مطلوبہ ہدف 23.3 اوورز میں صرف دو وکٹوں کے نقصان پر باآسانی حاصل کر لیا۔
دوسری اننگز میں عبداللہ شفیق اور کپتان بابر اعظم بالترتیب 24، 24 رنز بنا کر ناٹ آؤٹ رہے جبکہ اذان اویس 18 اور امام الحق 9 رنز بنا کر آؤٹ ہوئے۔
شاندار سنچری بنانے پر عبداللہ شفیق کو ‘پلیئر آف دی میچ’ قرار دیا گیا، جبکہ بابر اعظم اور ویسٹ انڈیز کے جسٹن گریوز کو مشترکہ طور پر ‘پلیئر آف دی سیریز’ کے ایوارڈ سے نوازا گیا۔
یاد رہے کہ سیریز کے پہلے ٹیسٹ میں ویسٹ انڈیز نے پاکستان کو 90 رنز سے شکست دی تھی۔