ماہرہ خان کی شاہ چارلس سے ملاقات، پاکستانی اداکارہ کے سماجی کاموں کی تعریف
لندن: پاکستانی شوبز انڈسٹری کی سدا بہار اور عالمی شہرت یافتہ اداکارہ ماہرہ خان نے ایک بار پھر بین الاقوامی سطح پر پاکستان کا نام روشن کیا ہے۔ لندن میں منعقدہ ‘برٹش ایشین ٹرسٹ’ کی ایک پروقار فلاحی تقریب میں ماہرہ خان نے برطانیہ کے بادشاہ شاہ چارلس (King Charles) سے خصوصی ملاقات کی ہے۔
تقریب کے بعد میڈیا سے گفتگو کرتے ہوئے ماہرہ خان نے شاہ چارلس کی شخصیت اور ان کے ساتھ ہونے والی بامعنی گفتگو کا احوال شیئر کیا، جبکہ معاشرے میں ذہنی صحت سے جڑے منفی رویوں پر گہری تشویش کا اظہار بھی کیا۔
برطانوی شاہی خاندان کے سربراہ سے ملاقات کے تجربے کو یادگار قرار دیتے ہوئے ماہرہ خان نے بتایا "میری شاہ چارلس سے بہت اچھی، خوشگوار اور بامعنی بات چیت ہوئی۔ وہ ایک انتہائی چارمنگ (متاثر کن) اور خوش اخلاق شخصیت کے مالک ہیں۔ وہ نہ صرف برٹش ایشین ٹرسٹ کے فلاحی کاموں میں گہری دلچسپی رکھتے ہیں بلکہ انہیں یہ بھی معلوم تھا کہ میں پاکستان میں سماجی طور پر کیا کام کر رہی ہوں۔”
اداکارہ نے مزید بتایا کہ شاہ چارلس نے ان سے پوچھا کہ مختلف منصوبے کس طرح آگے بڑھ رہے ہیں اور برٹش ایشین ٹرسٹ کے ساتھ طویل عرصے سے وابستگی اور سماجی خدمات پر ان کا خصوصی شکریہ بھی ادا کیا۔
سماجی موضوعات پر گفتگو کرتے ہوئے ماہرہ خان نے اس بات پر افسوس کا اظہار کیا کہ ہمارے معاشرے میں ذہنی صحت (Mental Health) پر بات کرتے ہوئے لوگ اب بھی شرم محسوس کرتے ہیں۔ انہوں نے زور دے کر کہا:
"ذہنی امراض بھی دیگر جسمانی بیماریوں کی طرح ہی ہیں، جن کا علاج ممکن ہے۔ ہمیں دماغی امراض سے متعلق آگاہی بڑھانے کی شدید ضرورت ہے تاکہ لوگ بنا کسی جھجک کے مدد حاصل کر سکیں ہراسانی اور تشدد کے واقعات کی روک تھام کے لیے ہمیں اپنا مائنڈ سیٹ تبدیل کرنا ہوگا اور قانون توڑنے والوں کو عبرت کا نشان (مثال) بنانا ہوگا تاکہ معاشرے میں ایک مثبت اور واضح پیغام جائے۔”
برٹش ایشین ٹرسٹ کی اس تقریب میں ماہرہ خان کی شرکت اور شاہ چارلس کی جانب سے ان کی پذیرائی کو پاکستانی فینز اور سوشل میڈیا پر بے حد سراہا جا رہا ہے، اور اسے پاکستانی فنکاروں کی عالمی سطح پر بڑھتی ہوئی ساکھ کا ثبوت قرار دیا جا رہا ہے۔