پاک-افغان سرحد پر دراندازی کی دو بڑی کوششیں ناکام؛ سیکیورٹی فورسز کی کارروائی میں فتنہ الخوارج کے 13 دہشت گرد ہلاک

راولپنڈی: سیکیورٹی فورسز نے خیبر پختونخوا کے سرحدی اضلاع مہمند اور شمالی وزیرستان میں دہشت گردوں کی دراندازی کی دو بڑی کوششوں کو ناکام بناتے ہوئے فتنہ الخوارج کے 13 دہشت گردوں کو ہلاک کر دیا ہے۔

پاک فوج کے شعبہ تعلقات عامہ (آئی ایس پی آر) کے مطابق یہ کارروائیاں 28 اور 29 اپریل کو مؤثر انٹیلی جنس معلومات کی بنیاد پر کی گئیں۔

تفصیلات کے مطابق، ضلع مہمند میں سیکیورٹی فورسز نے سرحد پار سے آنے والے ایک گروہ کی نقل و حرکت کا بروقت سراغ لگایا۔ فورسز کی مؤثر جوابی کارروائی میں بھارتی سرپرستی میں کام کرنے والے فتنہ الخوارج کے 8 دہشت گرد ہلاک ہو گئے۔

اسی طرح کی ایک اور کارروائی شمالی وزیرستان میں کی گئی جہاں سرحد پار سے دراندازی کرنے والے گروہ کے ساتھ شدید فائرنگ کا تبادلہ ہوا، جس کے نتیجے میں مزید 5 خوارج ہلاک کر دیے گئے۔

آئی ایس پی آر نے اپنے بیان میں واضح کیا کہ یہ واقعات ایک بار پھر افغان طالبان کی جانب سے مؤثر بارڈر مینجمنٹ میں ناکامی کی نشان دہی کرتے ہیں۔

بیان میں افغان حکومت پر زور دیا گیا ہے کہ وہ اپنے شہریوں کو پاکستان کے خلاف دہشت گردی کے لیے استعمال ہونے سے روکے اور بین الاقوامی ذمہ داریاں پوری کرے۔

ترجمان پاک فوج کا کہنا تھا کہ سیکیورٹی فورسز ملکی سرحدوں کے دفاع کے لیے مکمل طور پر پرعزم ہیں اور ‘وژن عزمِ استحکام’ کے تحت بیرونی سرپرستی میں ہونے والی دہشت گردی کے مکمل خاتمے تک مہم پوری رفتار سے جاری رہے گی۔

علاقے میں ممکنہ دیگر دہشت گردوں کے خاتمے کے لیے کلیئرنس آپریشنز اب بھی جاری ہیں۔