ہمارے مشترکہ مفادات اور تقدیریں جڑی ہیں: ایرانی صدر مسعود پزشکیان کا پاکستان کے 79ویں یومِ آزادی پر تہنیتی پیغام

تہران: ایران کے صدر مسعود پزشکیان نے پاکستان کے 79ویں یومِ آزادی کے پرمسرت موقع پر حکومت اور عوام کو مبارکباد دیتے ہوئے کہا ہے کہ ایران اور پاکستان کے مشترکہ مفادات اور تقدیریں پہلے سے کہیں زیادہ ایک دوسرے سے منسلک اور جڑی ہوئی ہیں۔

اپنے خصوصی تہنیتی پیغام میں ایرانی صدر نے کہا کہ پاکستان کا یومِ آزادی دیرینہ، برادرانہ اور تزویراتی (اسٹریٹجک) تعلقات کو مزید گہرا اور وسیع تر کرنے کے لیے ایک نیا اور قیمتی موڑ فراہم کرتا ہے۔

صدر مسعود پزشکیان نے واضح کیا کہ ایران، پاکستان کے ساتھ تمام شعبوں میں جامع تعلقات مزید مضبوط بنانے کے اپنے عزم پر قائم ہے۔ انہوں نے زور دیا کہ باہمی اعتماد، احترام اور دونوں ممالک کی وسیع صلاحتیوں سے فائدہ اٹھاتے ہوئے دوطرفہ سفارتی و اقتصادی روابط کو مستحکم بنانے کے لیے پہلے سے زیادہ موثر اقدامات کی ضرورت ہے۔

ایرانی صدر نے پاکستان کی تعمیر، ترقی، خوشحالی اور سربلندی کے لیے نیک تمناؤں کا اظہار کیا اور دونوں ممالک کے برادرانہ تعلقات کی مضبوطی کے لیے دعا کی۔

ایرانی میڈیا کے مطابق یہ پیغام ایک ایسے وقت میں سامنے آیا ہے جب دونوں برادر اسلامی ممالک کے درمیان اعلیٰ سطح کے روابط میں تیزی آئی ہے۔ رواں برس جون میں ایرانی صدر نے وزیراعظم شہباز شریف کی دعوت پر پاکستان کا اہم سرکاری دورہ کیا تھا، جبکہ پاکستان نے ایران اور امریکا کے درمیان طے پانے والی ‘اسلام آباد مفاہمتی یادداشت’ کے لیے اہم ثالث کا کردار ادا کیا ہے۔

اس کے علاوہ سعودی عرب، قطر، بحرین، اردن اور روس سمیت دیگر متعدد عالمی ممالک نے بھی پاکستان کے یومِ آزادی پر مبارکباد کے پیام ارسال کیے ہیں، تاہم ایرانی صدر کا پیغام خطے کی موجودہ صورتحال میں سیاسی و سفارتی لحاظ سے انتہائی اہم قرار دیا جا رہا ہے۔