ضلع نوشکی میں سیکیورٹی خدشات اور دہشت گرد حملوں کے پیش نظر کرفیو نافذ
کوئٹہ: حکومتِ بلوچستان کے محکمہ داخلہ نے ضلع نوشکی میں دہشت گردی کے حالیہ واقعات اور سیکیورٹی خدشات کے پیش نظر ضلع بھر میں دفعہ 144 کے تحت مکمل کرفیو نافذ کرنے کا باضابطہ نوٹیفکیشن جاری کر دیا ہے۔
نوٹیفکیشن کے مطابق کرفیو 28 جولائی 2026 کی رات 8 بجے سے 31 جولائی 2026 کی رات 8 بجے تک نافذ العمل رہے گا۔
محکمہ داخلہ کے مطابق 28 جولائی کو نوشکی ویسٹرن بائی پاس پر واقع فرنٹیئر کور (ایف سی) پوسٹ پر دہشت گرد حملے اور قومی شاہراہ این-40 پر بڑھتی ہوئی شرپسندی کے بعد ضلعی انٹیلی جنس کوآرڈینیشن کمیٹی (DICC) کی سفارشات پر یہ قدم اٹھایا گیا ہے۔ مستند انٹیلی جنس اطلاعات کے مطابق اگست کے مہینے میں قانون نافذ کرنے والے اداروں اور سرکاری تنصیبات پر مزید دہشت گردانہ حملوں کا خدشہ موجود ہے۔
- کرفیو کے دوران مجاز اتھارٹی کی پیشگی اجازت کے بغیر کسی بھی شہری کی نقل و حرکت، عوامی اجتماعات اور جلوسوں پر مکمل پابندی ہو گی۔
- ڈپٹی کمشنر نوشکی کی جانب سے سرکاری افسران، ایمرجنسی طبی عملے، ریسکیو اور یوٹیلیٹی سروسز سے وابستہ افراد کو خصوصی استثنیٰ حاصل ہو گا۔
- قانون نافذ کرنے والے اداروں کو نوٹیفکیشن پر سختی سے عمل درآمد کی ہدایت کی گئی ہے اور خلاف ورزی کرنے والوں کے خلاف سخت قانونی کارروائی کی جائے گی۔