حکومت نے پیٹرول اور ڈیزل مزید مہنگا کر دیا
اسلام آباد: حکومتِ پاکستان نے آئل اینڈ گیس ریگولیٹری اتھارٹی (اوگرا) اور پیٹرولیم ڈویژن کی سفارش پر پیٹرولیم مصنوعات کی قیمتوں میں مسلسل دوسرے روز بھی اضافے کا اعلان کر دیا ہے۔
پیٹرولیم ڈویژن سے جاری ہونے والے تازہ نوٹیفکیشن کے مطابق پیٹرول کی فی لیٹر قیمت میں 5 روپے 58 پیسے کا اضافہ کیا گیا ہے، جس کے بعد پیٹرول کی نئی قیمت 364 روپے 35 پیسے فی لیٹر مقرر ہو گئی ہے۔
اسی طرح ہائی اسپیڈ ڈیزل کی قیمت میں 4 روپے 18 پیسے فی لیٹر اضافہ کیا گیا ہے، جس کے بعد ڈیزل کی نئی قیمت 385 روپے 95 پیسے فی لیٹر کی سطح پر پہنچ گئی ہے۔ اوگرا کے مقرر کردہ ان نئے نرخوں کا اطلاق 9 ستمبر 2026 سے ہو گا۔
واضح رہے کہ حکومت نے اس سے قبل بھی پیٹرول اور ڈیزل کے نرخوں میں نمایاں اضافہ کیا تھا۔ مقامی سطح پر قیمتوں میں اس مسلسل اضافے کی بنیادی وجہ مشرقِ وسطیٰ میں بڑھتی ہوئی کشیدگی اور عالمی منڈی میں خام تیل کے نرخوں میں مسلسل تیزی ہے۔
عالمی مارکیٹ میں امریکی خام تیل (WTI) کی قیمت 2 فیصد اضافے کے بعد 93 ڈالر سے تجاوز کر گئی ہے جبکہ برطانوی خام تیل (Brent) کی قیمت 98 ڈالر فی بیرل تک پہنچ چکی ہے۔