مچل اسٹارک کی تباہ کن بولنگ، آسٹریلیا نے بنگلا دیش کو اننگز اور 51 رنز سے ہرا کر سیریز برابر کر دی
میکائے: آسٹریلوی فاسٹ بولر مچل اسٹارک کی تباہ کن بولنگ کی بدولت آسٹریلیا نے بنگلا دیش کو دوسرے ٹیسٹ میں صرف دو ہی دن کے کھیل میں ایک اننگز اور 51 رنز کے بھاری مارجن سے شکست دے کر دو میچوں کی سیریز 1-1 سے برابر کر دی ہے۔
ٹاس جیت کر پہلے بیٹنگ کرنے والی بنگلا دیشی ٹیم آسٹریلین بولنگ حملے کے سامنے ریت کی دیوار ثابت ہوئی اور پہلی اننگز میں صرف 64 رنز پر ڈھیر ہو گئی۔ جواب میں آسٹریلیا نے کیمرون گرین کے 67 اور اسٹیو اسمتھ کی ذمہ دارانہ بیٹنگ کے بدولت اپنی واحد اننگز میں 210 رنز بنا کر 146 رنز کی نمایاں برتری حاصل کر لی۔
دوسری اننگز میں بھی بنگلا دیشی بلے باز بالکل بے بس نظر آئے اور پوری ٹیم 95 رنز پر آل آؤٹ ہو گئی۔ 21 سال میں یہ پہلا موقع ہے کہ کسی ٹیم کو ایک ٹیسٹ کی دونوں اننگز میں 100 سے کم رنز پر آؤٹ کیا گیا ہو۔ آسٹریلیا کے فاسٹ بولر مچل اسٹارک نے دوسری اننگز میں 4 اور میچ میں مجموعی طور پر 10 وکٹیں حاصل کیں، جبکہ کپتان پیٹ کمنز اور نیتھن لائن نے 3، 3 وکٹیں لیں۔
مچل اسٹارک کو شاندار بولنگ پر ‘پلیئر آف دی میچ’ اور سیریز میں سب سے زیادہ 12 وکٹیں لینے پر ‘پلیئر آف دی سیریز’ کا ایوارڈ دیا گیا۔ واضح رہے کہ بنگلا دیش نے ڈارون میں کھیلے گئے پہلے ٹیسٹ میں فتح حاصل کر کے تاریخ رقم کی تھی، تاہم دوسرے ٹیسٹ کے نتیجے کے بعد سیریز ڈرا ہو گئی جبکہ آئی سی سی ورلڈ ٹیسٹ چیمپئن شپ کے پوائنٹس ٹیبل پر آسٹریلیا بدستور پہلے نمبر پر براجمان ہے۔