ملک بھر کے بجلی صارفین کے لیے ریلیف ختم ہونے کے قریب، بجلی مہنگی ہونے کا خدشہ
اسلام آباد: کراچی سمیت ملک بھر کے بجلی صارفین کے لیے ایک روپے 99 پیسے فی یونٹ کمی کا بڑا سہ ماہی ایڈجسٹمنٹ ریلیف ختم ہونے کے قریب پہنچ گیا ہے، جس کے بعد آئندہ ماہ سے بجلی کے نرخوں میں دوبارہ اضافے کا خدشہ پیدا ہو گیا ہے۔
ذرائع کے مطابق بجلی صارفین کو جنوری تا مارچ 2026 کی سہ ماہی ایڈجسٹمنٹ کی مد میں مجموعی طور پر 67 ارب 17 کروڑ روپے سے زائد کا ریلیف فراہم کیا جا رہا تھا۔ جون 2026 سے جاری اس ایڈجسٹمنٹ کی تین ماہ کی مدت رواں ماہ اگست 2026 میں مکمل ہو جائے گی، جس کے بعد اپریل تا جون 2026 کی نئی سہ ماہی ایڈجسٹمنٹ ستمبر سے لاگو ہونے کا امکان ہے۔
بجلی تقسیم کار کمپنیوں (ڈسکوز) نے نئی سہ ماہی ایڈجسٹمنٹ کے تحت نیشنل الیکٹرک پاور ریگولیٹری اتھارٹی (NEPRA) میں باضابطہ درخواست جمع کروا دی ہے۔ درخواست میں صارفین پر 23 ارب روپے سے زائد کا اضافی مالی بوجھ منتقل کرنے کی تجویز دی گئی ہے، جو فی یونٹ تقریباً 1 روپے بنتا ہے۔
تاہم، سہ ماہی ایڈجسٹمنٹ کی مد میں بجلی کی قیمتوں میں حتمی اضافے یا رد و بدل کا فیصلہ نیپرا کی جانب سے تفصیلی سماعت اور جائزہ لینے کے بعد کیا جائے گا۔