ملتان کرکٹ اسٹیڈیم میں نیشنل چیمپئنز کپ کی ٹرافی کی رونمائی، چاروں ٹیموں کا اعلان
ملتان: ملتان کرکٹ اسٹیڈیم میں پاکستان کرکٹ بورڈ (پی سی بی) کے زیرِ اہتمام منعقد ہونے والے ‘نیشنل چیمپئنز کپ’ کی شاندار افتتاحی ٹرافی کی رونمائی کر دی گئی، جس میں ٹورنامنٹ میں شریک چاروں ٹیموں کے کپتانوں نے شرکت کی۔
ٹرافی کی رونمائی کے موقع پر پاکستان گولڈ کے کپتان شاہین شاہ آفریدی، پاکستان بلوز کے کپتان صاحبزادہ فرحان، پاکستان وائٹس کے کپتان صائم ایوب اور پاکستان گرینز کے نائب کپتان فہیم اشرف موجود تھے، جبکہ گرینز کے کپتان شاداب خان تقریب میں شریک نہ ہو سکے۔
یہ ٹورنامنٹ سنگل راؤنڈ رابن فارمیٹ پر کھیلا جائے گا جہاں تمام ٹیمیں ایک دوسرے کے خلاف ایک ایک میچ کھیلیں گی، جس کے بعد سرفہرست دو ٹیمیں 18 اگست 2026 کو فائنل میں مدمقابل ہوں گی۔ پی سی بی کے مطابق یہ ایونٹ 2027 کے ون ڈے ورلڈ کپ کی تیاریوں کے سلسلہ میں اہم سنگِ میل ثابت ہوگا۔
پی سی بی نے اس ٹورنامنٹ کے لیے مجموعی طور پر 44 کھلاڑیوں کا انتخاب کیا ہے، جبکہ 13 ریزرو کھلاڑی بھی رکھے گئے ہیں۔ چاروں ٹیمیں درج ذیل ہیں:
- پاکستان گرینز: شاداب خان (کپتان)، فہیم اشرف، فخر زمان، فرحان یوسف، مہران ممتاز، محمد حسنین، محمد سلمان مرزا، نسیم شاہ، عمیر بن یوسف، سعد بیگ اور سمیر منہاس۔
- پاکستان وائٹس: صائم ایوب (کپتان)، عاکف جاوید، علی رضا، حارث رؤف، حسن نواز، خوشدل شاہ، محسن ریاض، محمد وسیم جونیئر، سعد مسعود، شہزیب خان اور عثمان خان۔
- پاکستان بلوز: صاحبزادہ فرحان (کپتان)، عبداللہ شفیق، احمد دانیال، عرفات منہاس، حسن علی، حسین طلعت، جہانداد خان، روحیل نذیر، شمیل حسین، سفیان مقیم اور تیمور خان۔
- پاکستان گولڈ: شاہین شاہ آفریدی (کپتان)، عبدالصمد، عبدالسبحان، فیصل اکرم، حیدر علی، کامران غلام، معاذ صداقت، محمد نواز، محمد اخلاق، محمد عمران اور سعد خان۔