فرانس کا مسلسل تیسری بار فائنل کھیلنے کا خواب چور چور؛ اسپین 0-2 کی شاندار فتح کے ساتھ 16 سال بعد فیفا ورلڈ کپ کے فائنل میں داخل
ڈیلس: فیفا فٹبال ورلڈ کپ 2026 کے 23ویں ایڈیشن کے پہلے سیمی فائنل میں اسپین نے شاندار اور جارحانہ کھیل کا مظاہرہ کرتے ہوئے طاقتور حریف فرانس کو 0-2 سے دھول چٹا دی ہے۔
امریکی شہر ڈیلس کے پرہجوم اسٹیڈیم میں کھیلے گئے اس اعصاب شکن معرکے میں ہسپانوی ٹیم شروع سے ہی فرانسیسیوں پر حاوی دکھائی دی اور شاندار حکمتِ عملی کی بدولت کامیابی حاصل کر کے 16 برس بعد میگا ایونٹ کے فائنل میں پہنچنے کا اعزاز حاصل کر لیا۔
دوسری جانب مسلسل تیسری بار ورلڈ کپ کا فائنل کھیلنے کا خواب دیکھنے والی فرانس کی اسٹارز سے سجی ٹیم سیمی فائنل کی رکاوٹ عبور کرنے میں ناکام رہی اور ٹائٹل کی دوڑ سے باہر ہو گئی۔
میچ کے آغاز سے ہی اسپین نے بال کنٹرول برقرار رکھا اور فرانس کی مضبوط دفاعی لائن پر پے در پے حملے کیے۔
کھیل کے 22ویں منٹ میں اسپین کو اس وقت سنہری موقع ملا جب ریفری نے فاؤل پر انہیں پینلٹی کک دی۔
اسپین کے اسٹار میکل اویارزابال (Mikel Oyarzabal) نے پینلٹی کو کامیابی سے گول میں تبدیل کر کے اپنی ٹیم کو 0-1 کی برتری دلا دی، یہ جاری ورلڈ کپ میں ان کا پانچواں انفرادی گول بھی تھا۔
پہلے ہاف میں برتری حاصل کرنے کے بعد اسپین نے دوسرے ہاف میں بھی اپنے حملے جاری رکھے۔ میچ کے 58ویں منٹ میں پیڈرو پورو (Pedro Porro) نے ڈی ایریا کے باہر سے ایک انتہائی خوبصورت اور طاقتور شاٹ کے ذریعے گیند کو جال میں پہنچا کر برتری کو 0-2 کر دیا، جس نے فرانسیسی گول کیپر اور دفاع کو بالکل بے بس کر دیا۔
ٹورنامنٹ میں اب تک سب سے زیادہ 8 گول داغنے والے فرانس کے کپتان اور مایہ ناز اسٹرائیکر کلیان ایمباپے نے میچ میں واپسی کے لیے سر توڑ کوششیں کیں، لیکن ہسپانوی دفاع نے ان کی ایک نہ چلنے دی اور وہ گول کرنے میں ناکام رہے۔
اسپین کی ٹیم اس سے قبل صرف ایک بار 2010 میں فیفا ورلڈ کپ کے فائنل میں پہنچی تھی جہاں انہوں نے نیدرلینڈز کو ہرا کر اپنی تاریخ کا پہلا عالمی ٹائٹل جیتا تھا۔
اب 16 سال بعد ہسپانوی شائقین سڑکوں پر جشن منا رہے ہیں اور ان کی ٹیم ایک بار پھر تاریخ رقم کرنے سے صرف ایک جیت کی دوری پر ہے۔
فائنل میں اسپین کا مقابلہ ارجنٹینا اور انگلینڈ کے درمیان ہونے والے دوسرے سیمی فائنل کے فاتح سے ہوگا، جبکہ فرانسیسی ٹیم اب میامی میں تیسری پوزیشن کے لیے ہونے والے میچ میں مدمقابل ہوگی۔