سعودی دفاعی نظام نے مکہ مکرمہ کی جانب بھیجا گیا حوثی ڈرون فضائی حدود میں داخلے سے قبل تباہ کر دیا
مکہ مکرمہ: سعودی عرب کے فضائی دفاعی نظام نے یمن کے حوثی گروپ کی جانب سے مکہ مکرمہ کی سمت بھیجے گئے ایک ڈرون کو ممنوعہ فضائی حدود میں داخل ہونے سے قبل ہی روک کر تباہ کر دیا۔
سعودی قیادت میں قائم عسکری اتحاد کے ترجمان میجر جنرل ترکی المالکی نے تصدیق کی کہ 15 ستمبر کی شام کو ڈرون کو مکہ کے جنوب میں ناکارہ بنایا گیا جس کا ملبہ غیر آباد علاقے میں گرا۔ انہوں نے کہا کہ مکہ مکرمہ اور حرمین الشریفین کی سیکیورٹی ‘ریڈ لائن’ ہے اور یہ حوثیوں کی جانب سے مقدس شہر کو نشانہ بنانے کی دوسری کوشش تھی۔
اس سے قبل جولائی 2017 میں بھی بیلسٹک میزائل داغا گیا تھا، تاہم سعودی اتحاد اس بزدلانہ اقدام پر حوثیوں کے خلاف حتمی اور سخت جواب دے گا۔ دوسری جانب حوثی رہنماؤں حازم الاسد اور محمد الفراح نے سعودی عرب کے ان الزامات کو سراسر جھوٹ اور بے بنیاد قرار دے کر مسترد کر دیا ہے۔
اسلامی تعاون تنظیم (OIC) نے مقدس مقامات کی حرمت پامال کرنے کی اس کوشش کی سخت ترین الفاظ میں مذمت کی ہے اور اسے تمام اسلامی و بین الاقوامی قوانین کی خلاف ورزی قرار دیتے ہوئے سعودی عرب کے ساتھ کامل یکجہتی کا اظہار کیا ہے۔