فیفا ورلڈ کپ 2026؛ سیمی فائنل لائن اپ مکمل، فرانس، اسپین، ارجنٹینا اور انگلینڈ مدمقابل
نیویارک: دنیا کے سب سے بڑے اور مقبول ترین کھیل کا میلہ، "فیفا فٹبال ورلڈ کپ 2026” اپنے سنسنی خیز اور حتمی مرحلے میں داخل ہو گیا ہے۔
تمام چاروں کوارٹر فائنلز کے سنسنی خیز مقابلوں کے اختتام کے بعد سیمی فائنل کی لائن اپ مکمل ہو چکی ہے اور اب صرف چار عالمی سپر پاورز ٹرافی کی دوڑ میں باقی رہ گئی ہیں۔
ان ٹیموں میں تین بار کی عالمی چیمپئن فرانس، سابق چیمپیئن اسپین، دفاعی چیمپئن ارجنٹینا اور 1966 کی فاتح انگلینڈ شامل ہیں۔
اب دنیا بھر کے فٹبال شائقین کی نظریں اس سوال پر مرکوز ہیں کہ کیا ارجنٹینا اپنے اعزاز کا کامیابی سے دفاع کرے گا یا کوئی اور یورپی حریف ٹرافی اپنے نام کرے گا۔
اگلے معرکوں سے قبل تین روز کا وقفہ رکھا گیا ہے تاکہ ٹیمیں اپنی سیکیورٹی، حکمتِ عملی اور فٹنس کو حتمی شکل دے سکیں۔
فرانس بمقابلہ اسپین (پہلا سیمی فائنل):
ٹورنامنٹ کا پہلا سیمی فائنل دو روایتی یورپی حریفوں یعنی فرانس اور اسپین کے درمیان امریکی ریاست ٹیکساس کے شہر آرلنگٹن میں واقع عظیم الشان ڈیلاس اسٹیڈیم میں کھیلا جائے گا۔
یہ میچ امریکی وقت کے مطابق منگل 14 جولائی کو دوپہر 2 بجے جبکہ پاکستانی وقت کے مطابق بدھ 15 جولائی کی شب 12 بجے (نصف شب) شروع ہوگا۔
ارجنٹینا بمقابلہ انگلینڈ (دوسرا سیمی فائنل):
دوسرا سیمی فائنل روایتی عسکری اور فٹبال حریفوں یعنی لیونل میسی کی دفاعی چیمپئن ارجنٹینا اور جوڈ بیلنگھم کی فارم میں موجود انگلینڈ کے درمیان امریکی شہر اٹلانٹا میں کھیلا جائے گا۔
یہ اعصاب شکن مقابلہ امریکی وقت کے مطابق بدھ 15 جولائی کو سہ پہر 3 بجے جبکہ پاکستانی وقت کے مطابق جمعرات 16 جولائی کی شب 12 بجے شروع ہوگا۔
تیسری پوزیشن کا میچ اور فائنل کا معرکہ:
دونوں سیمی فائنلز میں شکست کھانے والی ٹیمیں تیسری پوزیشن کے لیے میامی کے اسٹیڈیم میں مدمقابل ہوں گی، جو امریکی وقت کے مطابق ہفتہ 18 جولائی کو شام 5 بجے (پاکستانی وقت کے مطابق اتوار 19 جولائی کی شب 2 بجے) کھیلا جائے گا۔
عالمی چیمپیئن کا تاج کس کے سر سجے گا؟ اس کا فیصلہ امریکی ریاست نیو جرسی کے شہر ایسٹ ردرفورڈ میں ہونے والے فائنل معرکے میں ہوگا جہاں دونوں سیمی فائنلز کی فاتح ٹیمیں اتوار 19 جولائی کو امریکی وقت کے مطابق سہ پہر 3 بجے مدمقابل ہوں گی۔
اب دیکھنا یہ ہے کہ کیا اٹلی اور برازیل کی طرح ارجنٹینا بھی اپنے اعزاز کا کامیاب دفاع کرنے والی تیسری ٹیم بنتا ہے یا کوئی نیا عالمی سورما سامنے آتا ہے۔