فیفا ورلڈکپ 2026؛ اسپین نے بیلجیئم کا سفر تمام کر دیا، 1-2 سے شکست دے کر سیمی فائنل میں جگہ پکی
لاس اینجلس: فیفا فٹبال ورلڈکپ 2026 کے دوسرے کوارٹر فائنل میں سابق عالمی چیمپئن اسپین نے ایک سنسنی خیز اور کڑے مقابلے کے بعد بیلجیئم کو 1-2 سے شکست دے کر سیمی فائنل کے لیے کوالیفائی کر لیا ہے۔
اس شاندار فتح کے بعد ہسپانوی ٹیم ٹورنامنٹ کے سیمی فائنل میں پہنچنے والی دوسری ٹیم بن گئی ہے، جہاں اس کا ٹکراؤ پہلے ہی کوالیفائی کرنے والی اسٹار فرانسیسی ٹیم سے ہوگا۔
امریکا کے شہر لاس اینجلس کے اسٹیڈیم میں کھیلے گئے اس ہائی پروفائل میچ میں دونوں ٹیموں نے آغاز سے ہی تیز اور جارحانہ فٹبال کا مظاہرہ کیا۔
ہسپانوی مڈفیلڈرز نے کھیل پر گرفت قائم رکھی، جس کے نتیجے میں میچ کے 30ویں منٹ میں مڈفیلڈر فیبیان روز نے ایک شاندار فیلڈ گول داغ کر اسپین کو 0-1 کی اہم برتری دلا دی۔
بیلجیئم نے اس برتری کے بعد ہمت نہ ہاری اور ہسپانوی ڈی ایریا پر دباؤ بڑھایا۔ کھیل کے 41ویں منٹ میں بیلجیئم کے اسٹار کھلاڑی چارلس ڈی کیٹالاری نے شاندار جوابی وار کرتے ہوئے گیند کو جال کی راہ دکھا کر مقابلہ 1-1 سے برابر کر دیا۔
دلچسپ بات یہ ہے کہ رواں فیفا ورلڈکپ 2026 کے پورے ایونٹ میں اسپین کے مضبوط دفاع کے خلاف اسکور ہونے والا یہ سب سے پہلا گول تھا۔
پہلے ہاف کے اختتام پر مقابلہ برابری پر ختم ہوا۔ دوسرے ہاف میں دونوں ٹیموں نے گول کرنے کے کئی سنہری مواقع ضائع کیے۔
جب میچ اپنے اختتامی لمحات کی طرف بڑھ رہا تھا اور لگ رہا تھا کہ مقابلہ اضافی وقت میں جائے گا، تبھی 88ویں منٹ میں اسپین کے میکیل مرینو نے ایک بہترین پاس پر شاندار گول اسکور کر کے اپنی ٹیم کو 1-2 کی فیصلہ کن برتری دلا دی۔
مقررہ وقت اور انجری ٹائم کے اختتام تک بیلجیئم کی ٹیم دوبارہ واپسی کرنے میں ناکام رہی اور یوں اسپین نے سیمی فائنل کا ٹکٹ کٹوا لیا۔