رونالڈو کا ورلڈ کپ جیتنے کا خواب ٹوٹ گیا؛ اسپین نے پرتگال کو ہرا کر ٹورنامنٹ سے باہر کر دیا
ڈیلاس: فیفا فٹبال ورلڈ کپ 2026 کے ایک اور انتہائی سنسنی خیز اور بڑے پری کوارٹر فائنل معرکے میں اسپین نے پرتگال کو 0-1 سے شکست دے کر ٹورنامنٹ سے باہر کر دیا ہے۔
اس شکست کے ساتھ ہی دنیا کے عظیم ترین فٹبالرز میں شمار ہونے والے کرسٹیانو رونالڈو کا اپنے کیریئر میں ورلڈ کپ ٹرافی اٹھانے کا خواب ہمیشہ کے لیے ادھورا رہ گیا ہے۔
امریکا کے شہر ڈیلاس کے فٹبال اسٹیڈیم میں کھیلے گئے اس اعصاب شکن میچ میں اسپین کی ٹیم شروع ہی سے پرتگال پر حاوی نظر آئی۔
اسپین نے میچ کے دوران پرتگال کے 10 حملوں کے مقابلے میں 15 جارحانہ حملے کیے۔ میدان میں ایک طرف اسپین کے ابھرتے ہوئے نوجوان اسٹار لمین یامال کی چست مووز تھیں تو دوسری جانب پرتگال کے تجربہ کار اور عمر رسیدہ کپتان کرسٹیانو رونالڈو، لیکن اس اہم ترین رات رونالڈو کا جادو چلنے میں ناکام رہا۔
میچ کا پہلا اور دوسرا ہاف دونوں ٹیموں کی سخت ترین کوششوں کے باوجود بغیر کسی گول کے برابر رہا اور ایسا لگتا تھا کہ میچ اضافی وقت یا پنالٹی شوٹ آؤٹ کی طرف چلا جائے گا۔
تاہم، کھیل کے مقررہ وقت کے بالکل آخری لمحات یعنی 90 ویں منٹ میں اسپینش مڈفیلڈرز نے ایک بہترین موو بنائی، جس پر میکائیل میرینو نے شاندار گول اسکور کر کے اسپین کو 0-1 کی برتری دلا دی۔
میکائیل میرینو کا یہ گول میچ کا واحد اور فیصلہ کن گول ثابت ہوا، جس نے پرتگال کو واپسی کا کوئی موقع نہ دیا۔
اپنے شاندار اور لازوال کیریئر کے آخری ورلڈ کپ کو یادگار بنانے میں ناکامی اور عالمی کپ جیتنے کا خواب ٹوٹ جانے پر کرسٹیانو رونالڈو اپنے جذبات پر قابو نہ رکھ سکے اور میدان میں ہی رو پڑے۔ ان کی روتی ہوئی تصاویر نے دنیا بھر کے کروڑوں شائقینِ فٹبال کو اداس کر دیا۔
دوسری جانب، اس یادگار کامیابی کے بعد اسپین نے شان سے کوارٹر فائنل کے لیے کوالیفائی کر لیا ہے، جہاں اب اس کا مقابلہ بیلجیئم اور میزبان امریکا کے درمیان ہونے والے پری کوارٹر فائنل میچ کی فاتح ٹیم سے ہوگا۔