فیفا ورلڈ کپ 2026؛ انعامی رقم اور ٹیموں کے لحاظ سے تاریخ کا سب سے بڑا میلہ، فاتح پر ڈالروں کی برسات
فٹبال کی دنیا کا سب سے بڑا ایونٹ، فیفا ورلڈ کپ 2026، اس بار اپنی وسعت اور انعامی رقم کے تمام پچھلے ریکارڈ توڑنے کے لیے تیار ہے۔ 11 جون 2026 سے امریکا، میکسیکو اور کینیڈا کی مشترکہ میزبانی میں شروع ہونے والے اس ٹورنامنٹ میں پہلی بار 48 ٹیمیں شرکت کریں گی، جبکہ گزشتہ ایونٹ میں یہ تعداد 32 تھی۔ دفاعی چیمپئن ارجنٹینا اپنے اعزاز کے تحفظ کے لیے میدان میں اترے گی۔
اس بار کا ورلڈ کپ نہ صرف ٹیموں کی تعداد بلکہ مالی لحاظ سے بھی تاریخی نوعیت کا ہے۔ فیفا نے ایونٹ کے لیے مجموعی طور پر 87 کروڑ 10 لاکھ ڈالرز کی خطیر رقم مختص کی ہے، جو کہ 2022 کے قطر ورلڈ کپ کے مقابلے میں تقریباً دوگنی ہے۔
ورلڈ کپ 2026 میں شرکت کرنے والی ہر ٹیم کو تیاریوں کے لیے 25 لاکھ ڈالرز اور کوالیفائی کرنے پر ایک کروڑ ڈالرز دیے جائیں گے۔ اس طرح محض ایونٹ کا حصہ بننے پر ہی ہر ٹیم ایک کروڑ 25 لاکھ ڈالرز کی حقدار ٹھہرے گی۔
ایونٹ کے فاتح کے لیے 5 کروڑ 35 لاکھ ڈالرز کی رقم رکھی گئی ہے (یاد رہے کہ 2022 میں ارجنٹینا کو 4 کروڑ 20 لاکھ ڈالر ملے تھے)۔ رنر اپ رہنے والی ٹیم کو 3 کروڑ 65 لاکھ ڈالرز ملیں گے۔ دیگر پوزیشنز کی تفصیل درج ذیل ہے:
| پوزیشن | انعامی رقم (فی ٹیم) |
| تیسری پوزیشن | 3 کروڑ 25 لاکھ ڈالرز |
| چوتھی پوزیشن | 3 کروڑ 5 لاکھ ڈالرز |
| 5 ویں سے 8 ویں پوزیشن | 2 کروڑ 25 لاکھ ڈالرز |
| 9 ویں سے 16 ویں پوزیشن | ایک کروڑ 85 لاکھ ڈالرز |
| 17 ویں سے 32 ویں پوزیشن | ایک کروڑ 45 لاکھ ڈالرز |
| 33 ویں سے 48 ویں پوزیشن | ایک کروڑ 25 لاکھ ڈالرز |
واضح رہے کہ اس بار ٹورنامنٹ میں اردن، ازبکستان، کیپ وردے اور کیوراساؤ (Curacao) کی ٹیمیں پہلی بار ورلڈ کپ کی تاریخ میں ڈیبیو کر رہی ہیں، جبکہ ترکیہ نے 24 سال کے طویل انتظار کے بعد کوالیفائی کیا ہے۔
میگا ایونٹ میں مجموعی طور پر 104 میچز کھیلے جائیں گے، جو کہ 2022 کے 64 میچز کے مقابلے میں بہت بڑی تعداد ہے۔ فیفا نے ایران کی جانب سے میچز کی منتقلی کی درخواست مسترد کرتے ہوئے شیڈول کو برقرار رکھنے کا اعلان کیا ہے۔