سیمی فائنل تک رسائی کے لیے پاکستان کو اب کیا کرنا ہوگا؟
آئی سی سی مینز ٹی20 ورلڈکپ کے سپر 8 مرحلے میں پاکستان اور نیوزی لینڈ کے درمیان کھیلا جانے والا اہم میچ بارش کے باعث منسوخ کر دیا گیا، جس کے بعد گروپ 2 کی صورتحال انتہائی دلچسپ اور پیچیدہ ہو گئی ہے۔
کولمبو میں کھیلے جانے والے اس مقابلے میں پاکستان کے کپتان سلمان علی آغا نے ٹاس جیت کر پہلے بیٹنگ کا فیصلہ کیا، تاہم مسلسل بارش کے باعث ایک بھی گیند نہ پھینکی جا سکی۔ امپائرز نے انتظار کے بعد میچ منسوخ کرنے کا اعلان کیا جس کے نتیجے میں دونوں ٹیموں کو ایک، ایک پوائنٹ دے دیا گیا۔
سپر 8 کے گروپ 2 میں پاکستان، نیوزی لینڈ، انگلینڈ اور سری لنکا شامل ہیں اور صرف ٹاپ دو ٹیمیں سیمی فائنل کے لیے کوالیفائی کریں گی۔ میچ واش آؤٹ ہونے کے بعد اب ہر مقابلہ عملی طور پر ناک آؤٹ کی حیثیت اختیار کر چکا ہے۔
پاکستان کا اگلا میچ 24 فروری کو انگلینڈ کے خلاف ہوگا جبکہ آخری گروپ میچ میزبان سری لنکا کے خلاف کھیلا جائے گا۔ ان دونوں میچز کے نتائج پاکستان کی سیمی فائنل تک رسائی کا فیصلہ کریں گے۔
اگر پاکستان نیٹ رن ریٹ پر انحصار کیے بغیر سیمی فائنل میں جگہ بنانا چاہتا ہے تو اسے اپنے باقی دونوں میچز جیتنا ہوں گے۔ ایسی صورت میں قومی ٹیم کے مجموعی پوائنٹس 5 ہو جائیں گے اور سیمی فائنل میں رسائی تقریباً یقینی ہو جائے گی۔
دوسری جانب اگر پاکستان ایک میچ جیتے اور ایک ہار جائے تو پھر کوالیفکیشن کا انحصار دیگر ٹیموں کے نتائج اور نیٹ رن ریٹ پر ہوگا۔ تاہم اگر قومی ٹیم دونوں میچز ہار جاتی ہے تو وہ ٹورنامنٹ سے باہر ہو جائے گی۔
بارش سے متاثرہ افتتاحی میچ کے بعد اب گروپ 2 میں ہر ٹیم کے لیے غلطی کی گنجائش نہ ہونے کے برابر رہ گئی ہے اور آئندہ مقابلے سیمی فائنل کی تصویر واضح کریں گے۔